Turkiya Rossiyadan gaz ta’minoti uchun 25 foizlik chegirmaga erishmoqchi

Turkiya Rossiya gazini yetkazib berishda 25 foizdan ortiq chegirmaga erishmoqchi. Anqara ertaga, 9-dekabr kuni Moskva bilan muzokaralar davomida import narxlarini pasaytirish shartlarini muhokama qilishni rejalashtirmoqda. Bu haqda Bloomberg turkiyalik yuqori martabali amaldorlarga tayanib xabar berdi.

Agentlik ma’lumotlariga ko‘ra, turk tomoni chegirma nafaqat 2023-yil uchun to‘lovlarga, balki 2022-yilda amalga oshirilgan to‘lovlarga ham tatbiq etilishini kutmoqda. 

Agar tomonlar narxni pasaytirish bo‘yicha kelishuvga erisha olmasalar, Bloomberg aniqlik kiritishicha, Anqara Rossiya gazini yetkazib berish uchun to‘lovlarni 2024-yilgacha kechiktirishga erishmoqchi.

Agentlik ma’lumotlariga ko‘ra, Rossiya bilan kelishuv 2022-yil boshidan buyon 37,8 foizga tushib ketgan turk lirasi uchun bosimni yumshatishi mumkin. 

Bundan tashqari, kelishuv Turkiyaning amaldagi prezidenti Rajab Toyyib Erdo‘g‘onga 2023-yilgi prezidentlik saylovlari oldidan energiya narxining oshishidan qochishga yordam berishi mumkin.

Turkiya Statistika instituti (Turkstat) ma’lumotlariga ko‘ra, 2022-yil oktabr oyi natijalariga ko‘ra, Rossiyadan mineral yoqilg‘i, xususan, ko‘mir, neft va tabiiy gaz importi 25 foizga kamaygan.

Avvalroq Turkiya Yevropani gaz bilan ta’minlamoqchiligi haqida xabar berilgan edi.